कास्की – पोखरा महानगरपालिका-१८ मा नौ मत हराएको भन्दै नेकपा एमालेले पुनः गणनाको माग गरेलगत्तै नेपाली कांग्रेसले पनि निवेदन दिएको छ । कांग्रेसले पोखरा १ र १७ नम्बर वडामा पुनः गणनाको माग गरेको हो ।
वडा नम्बर १ की कांग्रेस उम्मेदवार सीता गुरुङले पुनः गणनाको माग गर्नुभएको हो । पोखरा १ मा एमालेकी सहारा प्रधान ४१ मत अन्तरले विजयी हुनुभएको थियो । प्रधानले एक हजार एक सय ४५ र गुरुङले एक हजार एक सय ४ मत पाउनुभएको थियो ।
यस्तै वडा नम्बर १७ का कांग्रेस उम्मेदवार देवराज आचार्यले पनि पुनः गणनाको माग गर्नुभएको छ । आचार्यले गुरुङकै ढाँचामा निवेदन बुझाउनुभएको हो । आचार्य र गुरुङ दुवैले पहिले भन्दा फरक गणक राख्न र निष्पक्ष रूपमा गणना गर्नुपर्ने माग राखेका छन् ।
वडा नम्बर १७ मा ८३ मत अन्तरले एमालेकी राधिका शाहीले चुनाव जित्नुभएको हो । शाहीले दुई हजार ६ सय २५ र आचार्यले दुई हजार पाँच सय ४२ मत पाउनुभएको थियो ।
