मौन आवाज -  गरीबहरूको घोषणापत्र -  गाउँभरि टाँसेर -
दु:खका व्यापक पोस्टरहरू
हामी आएका छौँ मुलुकको राजधानी 
र / नगरी कुनै पत्रकार सम्मेलन 
घोषणा गर्छौं -
गरीबहरूको घोषणापत्र !

निरक्षर पहाडको चुलिमा 
गाडेर पीडाको झन्डा
हामी आएका छौं नयाँ नारा बोकेर 
यो देशमा खोल्नलाई अनाम पार्टी !

- पसिना हाम्रो अस्त्र हो 
- रगत हो हाम्रो सिद्धान्त 
- आगो हो आगो हाम्रो कार्यदिशा 
- भोक हाम्रो विचार हो 
र / नाङ्गो शरीर हो हाम्रो राजनीतिक किताब ।

हामीलाई थाहा छैन -
चे ग्वेभारा क्रान्तिकारी हुन् कि आतंककारी ?
थाहा छैन अलेक्जेण्डर महान 
कसरी भयो महान ?

सुकरातले खाएको विषको नाम 
हामीलाई कण्ठ छैन 
हामीलाई एउटै कुरा कण्ठ छ -
बच्चाहरु भोकै छन् 
आइमाईहरु भोकै छन् 
भोकै छौं हामी पनि !

माओ त्सेतुङ्गको साम्यवाद 
गान्धीको अहिंसावाद 
अमेरिकाको साम्राज्यवाद ( टन्न अघाएकाहरुको दर्शन ,वा षडयन्त्र )
केही पनि बुझ्दैनौं हामी 
हाम्रो भाग्यको बाटोमा लामो ( क्रस लाईन सत्ताले कोरेको छ )
हामी अलमल छौं युगौंदेखि !

- हामीलाई यशू बनाइएको छ ( अन्धकारमा क्रुसमा झुण्ड्याएर) 
शान्त (निर्जीव झैं ) बुद्ध बनाइएको छ 
महादेव बनाइएको छ धतुरो खुवाएर 

- हामी निर्लिप्त बेहोसीबाट उठिसक्यौं
ब्युँझि सक्यौं अचेत चेतनाबाट 
आइन्दा !
दु:खमाथि कविता लेख्न निषेध गर्छौं 
गरिबी माथि भाषण गर्न निषेध गर्छौं
निषेध गर्छौं हामी माथि मनपरि कानून लाद्न 

हामी यो राज्यमा घोषणा गर्छौं छुट्टै राज्य 
घोषणा गर्छौं -
छुट्टै हाम्रो संघर्षको लडाईं -

हामीलाई बनाएर आधार 
नगरे हुन्छ कम्युनिस्टहरुले राजनीति
काङ्ग्रेसहरुले प्रजातन्त्रको नफलाके हुन्छ गफ -

हाम्रो जिवनको भूगोल नागबेली छ 
र / हामीलाई थाहा छ -
सत्ताको आश्वासन बोक्ने थोत्रो गाडी 
हामीसम्म आइपुग्छ / विकास होइन ।

हामीलाई थाहा भैसक्यो -
कस्तो बन्दैछ देश / कस्तो बनाईंदैछ बजेट 

चर्चरी फुटेको पाइतालामा राखेर विद्रोह
प्रतिरोधी चेतनाले पागल छौं हामी 
कि हामीलाई दमन गर 
कि आक्रोश हाम्रो समन गर !

निस्किसक्यौं -
भत्केका टहराहरुबाट निस्किसक्यौं
हिंडिसक्यौं खण्डहर सपनाको विपरीत बाटो ।

हामी आइपुग्यौं बिना सूचना 
तिमीहरुको प्राधिकार क्षेत्रहरुमा 
हेर -
ओर्लेर सिंहदरबारको कौसीबाट 
हामी कस्ता देखिन्छौं ?

भिखारी जस्ता ?
वा / विद्रोही जस्ता ?

मस्तिष्कमा बोकेर विकल्पको अन्तिम क्षेप्यास्त्र
हामी आएका छौं मुलुकको राजधानी 
र / नगरि कुनै प्रचारबाजी 
घोषणा गर्छौं -
गरिबहरुको घोषणापत्र !

✍️ मौन आवाज - ( २०७१ सालमा प्रकाशित " यो शताब्दीमा म पनि छु " संग्रहबाट )