काठमाडौं: विश्वकै ठूलो पर्यटन मेला मानिने ‘वर्ल्ड टुरिजम मार्केट २०२२’ बेलायतमा सम्पन्न भएको छ। कोभिड(१९ महामारीपछि आयोजित यो डब्युटिएममा नेपालले पनि सहभागिता जनाएको थियो।
डब्ल्युटिएममा नेपाल पर्यटन बोर्डको नेतृत्वमा नेपालका २४ वटा पर्यटन कम्पनी सहभागी भएका थिए। डब्ल्युटिएममा राखिएको नेपालको स्टलको कात्तिक २१ गते बेलायतका लागि नेपाली राजदूत ज्ञानचन्द्र आचार्यले उद्घाटन गरेका थिए।
राजदूत आचार्यले नेपाली स्टलमा रहेका प्रत्येक सहभागी कम्पनीको निरीक्षण गर्नुका साथै सहभागी सबैलाई नेपालको पर्यटन प्रवर्द्धनका लागि प्रयास गर्न प्रोत्साहित गरेका थिए। नेपाल पर्यटन बोर्डका प्रमुख कार्यकारी अधिकृत डा। धनञ्जय रेग्मीले मेलाले कोभिडपछि देशको पर्यटन प्रवर्द्धनमा सकारात्मक भूमिका खेल्ने बताए।
डब्ल्युटिएममा विश्वभरिका पर्यटन आपूर्तिकर्ता र राष्ट्रिय‚ अन्तरराष्ट्रिय पर्यटन संगठन, पर्यटन मन्त्रालय, प्राधिकरण, ट्राभल एजेन्ट, टुर अपरेटर, होटल व्यवसायी, ट्राभल टेक कम्पनी, यातायात अपरेटर, एयरलाइन्स, साहसिक खेलकुद कम्पनी, सञ्चारमाध्यम, ब्लगर, पर्यटन विज्ञ, र व्यवसायीलगायत सबैले आ–आफ्ना पर्यटन उत्पादनहरू प्रदर्शन गरेका थिए।
डब्ल्युटिएममा रहेको नेपाल स्टलमा बेलायत र अन्य विभिन्न देशका पर्यटन व्यवसायी, मार्केटिङ परामर्शदाता, मिडिया, टुर अपरेटर, निजी कम्पनी, ट्राभल लेखक, मिडिया, फोटोग्राफर, ब्लगर र विभिन्न सामग्री निर्माता सहभागी भएका थिए।
नेपाली दूतावास र नेपाल पर्यटन बोर्डले संयुक्त रूपमा कात्तिक २२ गते लण्डनस्थित नेपाली दूतावासमा गरेको नेपाल साँझ विशेष कार्यक्रममा प्रख्यात बेलायती पर्वतारोही तथा साहसिक कार्यकर्ता सर क्रिस बोनिङटन र एलन हिङ्क्सले नेपालमा आफ्नो आरोहण तथा अनुभव सुनाउँदै बेलायतीहरूलाई जीवनभरको अनुभवका लागि नेपाल भ्रमण गर्न आह्वान गरेका थिए।
कार्यक्रममा १ सयभन्दा बढी बेलायती ट्राभल टुर अपरेटर, बेलायती पर्वतारोही, सञ्चारमाध्यम र अन्य विशिष्ट व्यक्ति सहभागी भएको नेपाल पर्यटन बोर्डका प्रबन्धक गोविन्द ओलीले जानकारी दिए।