काठमाडौँ– गत शुक्रबारदेखि प्रदर्शनमा आएको भारतीय फिल्म ‘एनिमलले’ शानदार व्यापार गरिरहेको छ । भारतमा विभिन्न रेकर्ड राखेको यस फिल्मले विदेशमा पनि सोही रफ्तारलाई निरन्तरता दिएको छ । अमेरिका र क्यानडामा पनि यस फिल्मको व्यापार राम्रो भएको बताइएको छ ।
सन्दीप भंगाले निर्देशन गरेको यस फिल्मले पहिलो दिनै शानदार ‘ओपनिङ’ गरेको थियो । ‘प्रदर्शनको दोस्रो दिन भारतमा सबैभन्दा व्यापार’ गर्ने चलचित्रको रेकर्ड एनिमलले नै बनायो ।
तेस्रो दिन पनि एनिमलले उत्कृष्ट व्यापार गरेको छ । त्यससँगै यो तीन दिनमै ‘२ सय करोड क्लब’मा प्रवेश गर्ने दोस्रो फिल्म बनेको छ । यसभन्दा अघि शाहरुख खानको जवान फिल्म तीन दिनमै २ सय करोड व्यापार गरेको हो ।
भारतीय सञ्चार माध्यमका अनुसार १०० करोड भारतीय रुपैयाँमा बनेको यस फिल्मले पहिलो दिन ६३ करोड ८० लाख कमाएको थियो ।
रेकर्ड ब्रेक गर्दै दोस्रो दिन ६६ करोड ७० लाखको व्यापार गर्याे । सुरुवाती दुई दिनको व्यापारलाई तुलना गर्दै एनिमले पठानलाई समेत पछि पारेको छ । त्यस्तै तेस्रो दिन अर्थात् आइतबार राति ९ बजेसम्म एनिमलले ७० करोडको व्यापार गरेको छ ।