काठमाडौं– अभिनेता विराज भट्टका छोरा समीरले फिल्म ‘१२ गाउँ’ मार्फत नेपाली चलचित्रमा डेब्यू गर्ने पक्का भएको छ ।
फागुनबाट छायांकनमा जाने निर्माण पक्षको तयारी छ । छोराको डेब्यू फिल्म भए पनि फिल्ममा विराज नै मुख्य भूमिकामा देखिनेछन् । विराज खबरहबसँग भन्छन्, ‘समीरको भूमिकाबारे थाहा पाउन चाहिँ हलमै पुग्नुपर्ने हुन्छ । उसको भूमिका महत्वपूर्ण नै छ ।’
‘१२ गाउँ’लाई बिग एक्सन फिल्मका रुपमा पस्कने विराजको परिकल्पना छ । उनी भन्छन्, ‘दर्शकले बाउ–छोरालाई पूर्ण एक्सन अवतारमा देख्न पाइन्छ ।’
फिल्ममा नायिका भने तय नभइसकेको विराजको भनाइ छ । नयाँ प्रतिभाले नै फिल्ममा स्थान पाउने सम्भावना रहेको उनी बताउँछन् ।
फिल्मको निर्देशक र निर्मातासमेत विराज स्वयं हुन् । विराजको ब्यानरमा बन्ने र निर्देशन रहने यो दोस्रो फिल्म हो ।
यो फिल्मको केही गीत मुम्बईमै रेकर्ड भइसकेको छ ।
के गर्दैछन् समीर ?
विराजका छोरा समीर मुम्बईमा बस्दै आएका छन् । विगत लामो समयदेखि उनी फिल्मको तयारीमा थिए । अन्य नेपाली निर्देशकबाट फिल्मको अफर आउँदा पनि यही फिल्मका लागि खेल्न नदिएको उनको भनाइ छ ।
विराज भन्छन्, ‘हामी तपाईंको छोरालाई नायक बनाउँछौं भनेर धेरै निर्देशक आउनुभएको थियो, मैले चाहिँ पहिले मेरैबाट सुरुवात गराउँछु भनेर रोकेको हुँ ।’
विराजका अनुसार समीर मार्सल आर्ट्स खेलाडीसमेत हुन् । उनले मार्सल आर्ट्स ब्ल्याक बेल्टसमेत लिएका छन् । त्यसबाहेक उनी भारतमै थिएटरमा पनि काम गर्दै आएका छन् । नमित कपुरको अभिनय इन्स्टिच्युटमा समेत उनले अध्ययन गरेका हुन् ।
फिल्मका लागि उनले नृत्य र जिम्न्यास्टिकको समेत तालिम लिएका छन् ।
बुबाजस्तै अग्लो कदका समीरले जिम गरेर शरीर पनि फिट राखेका छन् । विराजले सार्वजनिक गरेको तस्बिरमा उनको ‘सिक्स प्याक’ पनि देख्न सकिन्छ । उनको चकलेटी ‘लुक्स’को समेत चर्चा भएको छ ।
समीरको पढाइ मुम्बईमै भएको बुझिएको छ । छोरो मुम्बईमा भएकाले विराज भारत–नेपाल गरिरहन्थे ।