नयाँ दिल्ली । रितिक रोशन र दीपिका पादुकोणको फिल्म फाइटर जनवरी २५ मा फिल्म हलहरुमा रिलिज हुँदैछ । शनिबारदेखि फिल्मको एड्भान्स बुकिङ सुरु गरिएको थियो ।
इन्डष्ट्री ट्र्याकर स्याकनिल्कका अनुसार पहिलो दिन फिल्मको ६० हजार टिकट बिक्री भएको छ । यसबाट करीब २ करोड भारु कलेक्सन भएको बताइएको छ । खबरका अनुसार एड्भान्स बूकिङको पहिलो दिनमा ६ हजार ४२६ वटा शोका लागि ५९ हजार ३३६ वटा टिकट विक्री भएको छ । यसबाट १ करोड ९५ लाख भारु उठेको बताइएको छ ।
पठानको एनिभर्सरीमा फाइटर रिलिज
फाइटरको निर्देशन सिद्धार्थ आनन्दले गरेका हुन् । उनले शाहरुख खानको चर्चित फिल्म पठानको पनि निर्देशन गरेका थिए । सिद्धार्थले फाइटरलाई पठानको पहिलो एनिभर्सरीमा रिलिज गर्न लागेका छन् ।
गएको वर्ष जनवरी २५ मा रिलिज भएको थियो पठान । फिल्ममा शाहरुखको साथमा दीपिका पादुकोण पनि थिइन् । यो फिल्मले विश्वभर १ हजार ५० करोड भारु कमाएको थियो । यो गएको वर्षको सबैभन्दा धेरै कमाउने दोस्रो फिल्म थियो ।