काठमाडौं । जापानी फिल्म फेस्टिभल २०२४ शुक्रबारदेखि काठमाडौंमा सुरु भएको छ । पोखरामा फेस्टिभल सम्पन्न भएको पाँच दिनपछि काठमाडौंमा महोत्सव सुरु भएको हो ।
शुक्रबार र शनिबार जमलस्थित राष्ट्रिय नाचघरमा फेस्टिभल चल्नेछ । मार्च २० र २१ मा पानीपोखरीस्थित दूतावासको हलमा पनि फेस्टिभल हुनेछ । शुक्रबार केन्जी उचिदा निर्देशित १२५ मिनेट लामो कमेडी फिल्म ‘की अफ लाइफ’ प्रदर्शन गरिएको छ ।
शुक्रबार नै ‘स्कुप हन्टर’ समेत स्क्रिनिङ भएको छ । सन् २०१३ मा रिलिज भएको यो फिल्मले एक पत्रकारको कथा भन्छ जो जापानी नागरिकको जीवन अवस्थाको रेकर्डका लागि समय यात्रामार्फत १६ औं शताब्दीमा फर्किन्छ ।
शनिबार यासुकी साकाकीबारा निर्देशित फिल्म ‘सियोरी’ स्क्रिनिङ हुँदैछ । पिता बिरामी भएर कमजोर बनेपछि मासाया नामक छोराले असहाय महसुस गरेको कथा यसमा छ । भोलि नै ताकेसी वातानावे निर्देशित फिल्म ‘नेको निन्जा’ स्क्रिनिङ हुँदैछ । सोही दिन अर्को फिल्म ‘कामोमी डिनर’ पनि देखाइँदैछ ।
फिनल्याण्डको हेलसिन्कीमा होटल खोलेकी जापानी महिलाको कथावस्तुमा यो फिल्म बनेको छ । शनिबार जापानी डे समेत मनाइने भएकाले उक्त अवसरमा चित्रकला लगायतका प्रस्तुति पनि दिइने भएको छ ।
फेस्टिभलले नेपाल र जापानबीचको सांस्कृतिक सम्बन्ध प्रगाढ बनाउन भूमिका खेल्ने दूतावासको सांस्कृतिक विभागकी सचिव सातो मायाकुले अनलाइनखबरलाई बताइन् । पछिल्लो समय नेपालमा जापानी एनिमे फिल्म रुचाइने गरेको र जापानमा नेपाली फिल्म प्रदर्शन हुन थालेको कुरालाई उनले सकारात्मक संकेतको रुपमा लिइन् ।
जाल्टान र लानसँगको सहकार्यमा जापान फाउण्डेसन र जापानी दूतावासले फेस्टिभल आयोजना गरेका हुन् ।