महोत्तरी, १३ चैत : असिना पानी र हुरीबतास लागेपछि पाक्नै लागेको बालीमा क्षति पुगेको छ । आज बिहान परेको असिनापानी र हुरीबतासले महोत्तरीको दक्षिणपश्चिमी भेगमा गहुँ, जौ, अरहर (रहरी) र वैशाखी तरकारी बालीमा नोक्सान गरेको हो ।

    जिल्लाका भारतीय सीमावर्ती सोनमा, सम्सी, मनराशिवा, गौशाला, औरही, रामगोपालपुर र बलवासहितका स्थानीयतहका बस्तीमा हुरीबताससँगै असिनापानी परेको थियो । दुई÷चार दिनभित्रै काट्ने तयारीमा रहेको गहुँबाली असिनाले चुटेर खेतमै लडाएको रामगोपालपुर–३ का मोहम्मद कादिर हुसैनले बताउनुभयो ।

    असिनापानीले गहुँबालीमा सबैभन्दा बढी क्षति पुगेको छ । यसैगरी जौ, मुसुरो, चना र रहरी असिनाले चुटेर झारेको किसानको भनाइ छ । फर्सी, लौका र घिरौँलाजस्ता लहरे तरकारीमा क्षति पुगेको सोनमा गाउँपालिकाको खैरवनीका रामप्रताप यादवले बताउनुभयो । 

    असिनापानी र हुरीबतासले भङ्गाहा र एकडाराको पश्चिमतर्फको भेगमा पनि क्षति पु¥याएको छ । महोत्तरीमा पाँच दिनयता पानी परिहेको छ । लामो समयपछि पानी पर्दा बालीनालीलाई राहत मिलेको भए पनि असिनापानी र हुरीबतासले किसानलाई ठूलो क्षति पु¥याएको छ ।