झापा, ३० चैत: नेपाल खेलकुद पत्रकार मञ्च झापा शाखाले महिला बक्सिङकी त्रिशा जबेगु र तेक्वान्दोका रोशन मगरलाई ‘वर्ष उत्कृष्ट खेलाडी’बाट सम्मान गरेको छ ।
वि.सं. २०७९ मा राष्ट्रिय तथा अन्तर्राष्ट्रिय प्रतियोगितामा प्रदर्शन गरेको खेल कौशलका आधारमा बिहीबार साँझ विर्तामोडमा आयोजित ‘पाँचौँ स्पोर्टस् अवार्ड’ कार्यक्रममा मञ्चले खेलाडीद्वयलाई सम्मान गरेको हो ।
वर्ष उत्कृष्ट खेलाडी घोषित दुवैले जनही नगद रु. एक लाख र ट्रफी प्राप्त गर्नुभएको छ । सोही अवसरमा मञ्चले नेपालकी प्रथम ओलम्पियन मेनुका राउतलाई ‘लाइफ टाइम अचिभमेन्ट अवार्ड’बाट सम्मान गरेको छ । उहाँलाई नगद रु. ५० हजार प्रदान गरिएको हो ।
पत्रकारिताको माध्यमबाट खेल क्षेत्रको विकासमा योगदान पुर्याए वापत मञ्चले पत्रकार रमेश समदर्शीलाई ‘उत्कृष्ट खेल पत्रकार’बाट सम्मान गरिएको छ । उहाँलाई सम्मानस्वरुप नगद रु. ३५ हजार प्रदान गरिएको हो ।
फिफा रेफ्री श्याम दनुवारलाई ‘स्पेसल अचिभमेन्ट अवार्ड’ प्रदान गरिएको छ । उहाँलाई नगद रु. २५ हजार र ट्रफीले सम्मान गरिएको हो ।
यसैगरी, ‘वर्ष उत्कृष्ट युवा खेलाडी’ सम्मान पौडीका प्रारम्भ भण्डारी, ‘पिपल्स च्वाइस अवार्ड’बाट क्रिकेटकी राष्ट्रिय खेलाडी रुविना क्षेत्री र उत्कृष्ट प्रशिक्षकका रूपमा बक्सिङका डम्बर लिम्बूलाई सम्मान गरिएको छ । उहाँहरुलाई जनही रु. २५ हजार नगद प्रदान गरिएको हो ।
नेपाल खेलकुद पत्रकार मञ्चलले २०७३ सालदेखि ‘झापा स्पोट्र्स अवार्ड’ प्रदान गर्दै आएको छ ।
मञ्चका झापा अध्यक्ष इन्द्रजित मुखियाले देशका निम्ति समर्पित भएर लागेका खेलाडीलाई प्रोत्साहन गर्न सम्मान कार्यक्रमलाई भविष्यमा पनि निरन्तरता दिइने बताउनुभयो ।