काठमाडौँ, १४ जेठ: दुई वर्ष लगाएर बेलायतसहित विभिन्न देशमा छायांकन गरिएको फिल्म ‘लण्डन टु पेरिस’ जेठ २५ गते प्रदर्शनमा आउँदै छ । विदेशमा रहेका नेपाली युवाको कथा समेटिएकाले यस फिल्मको छायांकन उतै गरिएको हो ।
निर्माण पक्षका अनुसार यो प्रेमकथामा आधारित चलचित्र हो । ट्रेलरमा साम्राज्ञी शाह, गरिमा शर्मा र निश्चल खड्काबीचको त्रिकोणात्मक प्रेम सम्बन्ध देख्न सकिन्छ ।
सोमबार हात्तीसारमा फिल्मबारे सञ्चारकर्मीसँग अन्तरक्रिया गर्दै भिसा समस्याका कारण पेरिसमा सुटिङ नभएको निर्माण पक्षले जानकारी दियो । पेरिसको अंशको छायांकन भारतको मुम्बईको ‘इनडोर सेट’मा गरिएको सह–निर्माता सनिस खकुरेलले बताए ।
उनले भने, ‘फिल्म प्रदर्शनमा ल्याउनुपर्ने हतारले गर्दा पनि पेरिसमा खिचिएन । भिसाको पनि समस्या भयो । तर दर्शकले पेरिसमा छायांकन नभएको भन्ने महसुस गर्नु हुन्न ।’
नयाँ स्वादको फिल्म बनेको लेखक प्रदीप भारद्वाजले दाबी गरे । सोचेर लेखेको स्थानमा छायांकन नभए पनि निर्देशकले आफ्नो अपेक्षाअनुरूप नै नतिजा निकालेको उनको भनाइ छ ।
उनी भन्छन्, ‘लेखक र निर्देशकको भिजन नमिल्दा लेख्ने र बन्ने फिल्म फरक हुन्छ । लेखेको कालो हुन्छ तर फिल्म गोरो बन्छ । तर यसमा त्यो भएको छैन ।’
यद्यपि फिल्म लेख्नुअघि उनी लण्डन पुगेका थिएनन् । यसबारे प्रश्न गर्दा उनको जवाफ छ, ‘मैले वैज्ञानिक आइन्सटाइनलाई पनि देखेको छैन तर उहाँको सबैभन्दा शक्तिशाली सुत्र मलाई थाहा छ । गुगल, भिडियो र प्रविधिको सहयोगले त्यो परिवेशलाई सुहाउने कथा लेखेको छु ।’
नायिका साम्राज्ञीलाई भने यो फिल्म पनि पहिला गर्दै आएको भन्दा फरक नभएको बताइन् । उनले स्पष्ट पारिन्, ‘मैले ठाडो बोल्ने छुच्ची भूमिकामा नै छु यो फिल्ममा । यद्यपि फिल्म चाहिँ नयाँ स्वादको छ ।’
केन्द्रीय भूमिकामा रहेका गरिमा शर्मा र निश्चल खड्काको यो डेब्यू फिल्म हो । निर्माण पक्षका अनुसार फिल्ममा डेब्यू कलाकार गरिमासँग कबीर खड्काले रोमान्स गरेका छन् । साम्राज्ञीसँग अर्का डेब्यू कलाकार निश्चलले रोमान्स गरेका छन् ।