धुलिखेल (काभ्रेपलाञ्चोक), ३१ जेठ: ऊर्जा, जलस्रोत तथा सिँचाइमन्त्री शक्तिबहादुर बस्नेतले अब काभ्रेपलाञ्चोकको डाँडापारिस्थित महाभारत र खानीखोला गाउँपालिकाले काभ्रेको कर्णाली भनिरहनुपर्ने स्थिति नरहने अवस्था बनाउने बताउनुभएको छ ।
काभ्रेपलाञ्चोकको विकट डाँडापारिस्थित महाभारत गाउँपालिका–१ र ८ को सिमाना सोला भञ्ज्याङमा आज पूर्ण विद्युतीकरण घोषणा कार्यक्रममा उहाँले महाभारतलाई पूर्ण विद्युतीकरण भएको पालिका घोषणा गरिसकेको र खानीखोलाई चाँडै घोषणा गरिने बताउनुभयो ।
विकासको मूल प्रवाहमा ल्याउन आवश्यक विद्युतीकरणको काम भइरहेको र सडक सञ्जालले जोड्नका लागि जनमुक्ति मार्ग निर्माणको अभियान तीव्र गतिमा भइरहेकाले अब डाँडापारि कर्णाली जस्तो अवस्थामा नरहने उहाँको भनाइ थियो । त्यससँगै अब प्राथमिकताका साथ सिँचाइ र तटबन्धको काममा ध्यान दिने उहाँले बताउनुभयो । “अब हामीले यहाँको नागरिकको विकासप्रतिको चाहनालाई पूरा गर्नका निम्ति प्राथमिकताका साथ अगाडि बढाउँछौँ”, उहाँले भन्नुभयो ।
मन्त्री बस्नेतले विकासका काममा जनप्रतिनिधिलाई मात्रै जिम्मा लगाएर नपुग्ने बताउँदै आर्थिक, सामाजिक विकास र प्रगतिका लागि सकारात्मक भूमिका खेलेर सहयोग गर्न आमनागरिकलाई आग्रह गर्नुभएको छ ।
उहाँले काभ्रेपलाञ्चोक र सिन्धुलीको सिमानमा रहेको कोखाजोर खोलामा जलाशययुक्त आयोजनालाई अगाडि बढाउनका लागि सरकारले प्रक्रिया थालनी गरिसकेको जानकारी दिनुभयो । सो आयोजनाको सम्भाव्यता अध्ययन अन्तिम चरणमा पुगेको र इआईएको काम पूरा भइसकेको बताउनुभयो र
सांसद सूर्यमान दोङले डाँडापारि क्षेत्रमा विद्युतीकरण सम्पन्न गर्न सहयोग गर्ने सबै बधाईको पात्र भएको बताउँदै सो क्षेत्रको थप पूर्वाधार विकासको काममा निरन्तर लागिरहेको बताउनुभयो । सो क्रममा जनमुक्ति मार्ग आगामी २०८४ सालसम्ममा कालोपत्र गरिसक्ने बताउँदै बाँकी रहेका कोखाजोर जलायशयुक्त आयोजनाले विस्तारै साथर्कता पाउने उहाँले बताउनुभयो ।
नेपाल विद्युत् प्राधिकरणका प्रमुख कार्यकारी निर्देशक कुलमान घिसिङले प्राधिकरणको आम्दानी सबै विद्युतीकरणमा नै लगानी भएको बताउनुभयो । हालसम्म ५० वटा जिल्लामा पूर्ण विद्युतीकरण भइरहेको र बाँकी जिल्लामा विस्तारका लागि निरन्तर काम भइरहेको उहाँको भनाइ थियो । आफू अघिल्लो पटक कार्यकारी निर्देशक भएका बेलामा ३० प्रतिशत मात्रै विद्युतीकरण भएकामा अहिले सम्पन्न गर्ने चरणमा रहेको उहाँले बताउनुभयो ।
खानीखोला गाउँपालिका अध्यक्ष इन्द्रबहादुर थिङले पूर्ण विद्युतीकरण भइसकेको र जनमुक्तिमार्ग निर्माण सम्पन्नपछि डाँडापारिका नागरिकले थप सहजता पाउने विश्वास व्यक्त गर्नुभयो ।
नेपाल विद्युत् प्राधिकरणका निर्देशक अच्युत घिमिरेले नेपाल विद्युतीकरण र काभ्रे–मकवानपुर–रामेछाप–सिन्धुली ग्रामीण विद्युतीकरण आयोजनको रु १० करोड र विश्व बैंकको सहुलियतपूर्ण ऋण सहयोगमा सञ्चालित ग्रिड सोलार इफिसियन्सी आयोजना र काभ्रे वितरण केन्द्रको रु ४० करोड गरी कूल ५० करोड लागतमा महाभारत गाउँपालिका पूर्ण विद्युतीकरण घोषणा गर्न सफल भएको बताउनुभयो ।
त्यसका लागि ११ केभीको ६५ किलोमिटर विद्युत् लाइन विस्तार गरेको, कम क्षमताको तीन सय किमी लाइन विस्तार तथा ४० वटा वितरण ट्रन्सफर्मर वितरण गरेको उहाँले जानकारी दिनुभयो ।
महाभारत गाउँपालिका अध्यक्ष कान्तालाल जिम्बाले नेपाल विद्युत् प्राधिकरणले विगत पाँच वर्षदेखि महाभारत गाउँपालिकाको विभिन्न क्षेत्रमा रहेका बस्तीमा तीन हजार चार सय ३० घरधुरीमा विद्युत् मिटर वितरण गरी लाइन प्रसारणको काम सम्पन्न भएपछि आज पूर्ण विद्युतीकरण पालिका घोषणा गर्न सफल भएको बताउनुभयो ।