सुदूरपश्चिम, २ मङ्सिर : नेपाली कांग्रेसका सभापति एवं पूर्वप्रधानमन्त्री शेरबहादुर देउवाले कैलालीको गौरीगङ्गा नगरपालिका–१ स्थित चौमाला बहुमुखी क्याम्पसको नवनिर्मित भवनको आज उद्घाटन गर्नुभएको छ ।
सभापति देउवाले क्याम्पसलाई अध्ययन अध्यापनमा नमुना बनाउनु पर्नेमा जोड दिनुभयो । उहाँले सो क्याम्पसलाई विश्वविद्यालयको आङ्गिक क्याम्पस बनाउन आफूले पहल गर्ने बताउनुभयो ।
विसं २०७० मा सामुदायिक क्याम्पसका रुपमा स्थापित उक्त क्याम्पसमा हाल शिक्षा र व्यवस्थापन विषयमा स्नातक तहको पठनपाठन भइरहेको छ ।
समारोहमा सभापति देउवासमक्ष नगरपालिकाका प्रमुख देवीदत्त कँडेलले नगरमा औद्योगिक क्षेत्र र बहुउपयोगी सभा भवन निर्माण, खेलकुदको विकास, पर्यटन प्रवद्र्धनलगायतका योजनासम्बन्धी माग समेटिएको मागपत्र पेश गर्नुभएको थियो । सो अवसरमा सांसद वीरबहादुर बलायरले पनि आफ्नो धारणा राख्नुभएको थियो ।
सभापति देउवाले आजै कैलालीको गोदावरी नगरपालिका–५ स्थित गेटा मेडिकल कलेजको निरीक्षण गर्नुभयो । हाल मेडिकल कलेजका लागि निर्माण गरिएको भवनमा अस्पताल सञ्चालनमा छ ।
सरकारको झण्डै रु ६ अर्बभन्दा बढी लागतमा निर्मित उक्त भवनमा मेडिकल विश्वविद्यालय सञ्चालन गर्नुपर्ने माग स्थानीयवासीले उठाउँदै आएका छन् ।
उक्त कलेजलाई शहीद दशरथचन्द राष्ट्रिय स्वास्थ्य विज्ञान विश्वविद्यालय बनाउने निर्णय गरिए पनि हालसम्म विश्वविद्यालय सञ्चालन हुनसकेको छैन । यससम्बन्धी विधेयक हाल संसद्मा विचाराधीन छ ।