काठमाडौँ, ४ असारः नेपाल कम्युनिष्ट पार्टी (एमाले) का महासचिव शङ्कर पोखरेलले अहिलेको परिवर्तन कसरी ल्याइयो भन्ने विषय युवापुस्तालाई बुझाउन नसक्दा देशमा अराजकता बढेको बताउनुभएको छ ।
बेलायतको लण्डनस्थित नेपाली दूतावासले गएराति आयोजना गरेको कार्यक्रमलाई सम्बोधन गर्दै उहाँले लोकतन्त्र, गणतन्त्रका बारेमा अहिलेका पुस्तालाई बुझाउन आवश्यक रहेकामा जोड दिनुभयो ।
महासचिव पोखरेलले सङ्घर्षबाट प्राप्त लोकतन्त्र र आदर्शलाई भत्काउने प्रयास भइरहेको मुलुकलाई बलियो बनाउन लोकतान्त्रिक पक्षधर सबै एकजुट हुनुपर्ने आवश्यकता औँल्याउनुभयो ।
लोकतान्त्रिक तरिकाबाट समाजवाद निर्माणको बाटोमा अघि बढ्ने संवैधानिक प्रतिबद्धता व्यक्त गरिएको बताउँदै लोकतन्त्र, राजनीति र नेपाली समाजका बारेमा नकारात्मक चित्रण गर्ने प्रवृत्ति अन्त्य गर्न सबैले सहकार्य र समन्वय गर्नुपर्नेमा जोड दिनुभयो ।
“भ्रमलाई विश्वासका रूपमा ग्रहण गर्ने र सम्प्रेषण गर्ने प्रवृत्ति नेपाली समाजमा बढ्दै गएको छ, एकले अर्कालाई कमजोर बनाउन भ्रम छर्ने प्रवृत्ति नेपाली समाजमा बढेको छ । यसको अन्त्य गर्न सबैले समन्वय गर्नुपर्ने जरुरी छ”, उहाँले भन्नुभयो । सामाजिक सञ्जालबाट भ्रम छर्ने गतिविधि बढेकामा उहाँले चिन्ता व्यक्त गर्नुभयो ।
नेपाली समाजलाई अराजकतावादबाट जोगाउन सबैले साथ सहयोग गर्नुपर्नेमा महासचिव पोखरेलले जोड दिनुभयो । “अहिले लोकतन्त्र र गणतन्त्रकाविरुद्ध नियोजित प्रचार भइरहेका छन्, त्यसले नेपाली समाजलाई नकारात्मक प्रभाव पारिरहेको छ”, उहाँले भन्नुभयो ।
महासचिव पोखरेलले लोकतन्त्र प्राप्ति पछि हरेकको जीवनमा परिर्वतन भएको विश्वास व्यक्त गर्नुभयो । बेलायतमा रहेका नेपाली समुदायलाई आफू जन्मिएको ठाउँका लागि केही गर्ने सोच बनाउन अनुरोध गर्दै उहाँले विदेशमा कमाएको पुँजीको केही हिस्सा नेपालमा लगानी गर्न आग्रह गर्नुभयो ।
यही जेठ २९ गते उहाँ बेलायत र कतारमा आयोजना हुने विभिन्न कार्यक्रममा सहभागी हुन एमालेका पोलिटब्यूरो सदस्य सुजिता शाक्यसहित त्यसतर्फ जानुभएको थियो । महासचिव पोखरेल यही असार ८ गते स्वदेश फर्कनुहुनेछ ।