युरोपेली सङ्घ (इयु) का परराष्ट्र नीति प्रमुख काया कालासले इरानको आणविक कार्यक्रमसम्बन्धी विवाद समाधानका लागि आउँदो ३० दिनलाई कूटनीतिक अवसरको रूपमा हेर्नुपर्ने बताउनुभएको छ ।
शुक्रबार पत्रकारहरूसँग कुरा गर्दै उहाँले भन्नुभयो,“हामी अहिले ३० दिनको नयाँ चरणमा प्रवेश गर्दैछौं । यसले हामीलाई समस्या समाधान गर्न कूटनीतिक बाटो अपनाउने महत्त्वपूर्ण अवसर दिएको छ ।”
उहाँले थप स्पष्ट पार्दै भनिन्,“यी ३० दिनभित्र हामीले सबै पक्षबीच सहमति कायम गर्ने प्रयास गर्नुपर्नेछ।”
फ्रान्स, बेलायत र जर्मनीले बिहीबार संयुक्त राष्ट्रसंघअन्तर्गतको एक प्रक्रिया सुरु गरेका छन्, जसअनुसार इरानमाथि ३० दिनभित्र अन्तर्राष्ट्रिय प्रतिबन्ध पुनः लागु हुनसक्नेछ । उनीहरूको भनाइ अनुसार, इरानले सन् २०१५ मा विश्व शक्तिहरूसँग गरेको आणविक सम्झौताका बुँदाहरू पालना नगरेको आरोप छ ।
उक्त सम्झौताअनुसार इरानले आफ्नो आणविक कार्यक्रम सीमित गर्न सहमति जनाएको थियो, जसको बदलामा उसमाथि लागेका प्रतिबन्धहरू हटाइएको थियो । तर पछिल्लो समय इरानले सम्झौता उल्लङ्घन गरेको गुनासो गर्दै युरोपेली राष्ट्रहरूले कारबाहीको प्रक्रिया अघि बढाएका हुन् ।
इरानले भने यस कदमको विरोध जनाउँदै उपयुक्त रूपमा प्रतिक्रिया दिने चेतावनी दिएको छ । उसले यो कार्यले विगतका कूटनीतिक प्रयासहरूमा अवरोध पुग्ने सम्भावना रहेको जनाएको छ ।
यद्यपि, संयुक्त राष्ट्रसंघले भने हालको ३० दिनलाई ‘समझदारीमा पुग्न सकिने अवसर’ भएको बताएको छ ।
फ्रान्सका परराष्ट्र मन्त्री जाँ नोएल बारोले भन्नुभयो,“इरानको आणविक कार्यक्रमबारे चिन्ता गहिरिँदो छ । यसले अझ गम्भीर रूप नलेओस् भन्ने हाम्रो चाहना हो ।” तर उहाँले यो कदम कूटनीतिक पहलको अन्त्य होइन भन्ने कुरा स्पष्ट पार्नुभयो ।