रौतहट, १३ भदौः जिल्लास्थित सम्बद्ध निकायका अधिकारीहरूले प्राकृतिक प्रकोप एवं महामारीबाट बच्न अन्तर निकायहरूबीच समन्वयसहित सहकार्य हुनुपर्नेमा जोड दिएका छन् ।
सजग समाज परियोजनाको संयोजन तथा केयर नेपाल, महिलाको आवाज, अभियान नेपाललगायतका सङ्घसंस्थाको सहयोगमा आज गौरमा आयोजित एकदिने कृत्रिम घटना अभ्यास कार्यक्रमका सहभागीहरूले अन्तरनिकायबीच समन्वय, स्रोत साझेदारी र सूचना संयन्त्रलाई प्राथमिकता दिई धनजनको सम्भावित क्षति न्यूनीकरण गर्नुपर्नेमा जोड दिएका हुन् ।
प्रमुख जिल्ला अधिकारी विनोद खड्काले वाग्मती जलाधार क्षेत्रमा बर्सेनि दोहोरिने बाढीपहिरो र डुबानका कारण स्थानीय जनता प्रताडित हुने गरेको तथा धनजनको अपूरणीय क्षति भई राज्यले ठूलो नोक्सानी व्यहोर्नुपरेको उल्लेख गर्नुभयो । उहाँले तीनै तहको सरकारसहित राजनीतिक दल, नागरिक समाज, स्थानीय जनता र सम्बन्धित क्षेत्रमा कार्यरत सङ्घसंस्थासमेतको सहयोग र सहकार्यमा क्षति न्यूनीकरण तथा नियन्त्रण गर्ने नीति रहेको स्पष्ट पार्नुभयो ।
जिल्ला समन्वय समिति प्रमुख रामअयोध्या राय यादवले विपद्का समयमा तत्काल उद्धार तथा राहतमा जुट्नुको सट्टा रमिते बनी फोटो खिच्ने तथा भिडियो बनाउनेजस्ता गतिविधितर्फ युवापुस्ता सक्रिय हुन थालेकामा चिन्ता व्यक्त गर्नुभयो । विपद् व्यवस्थापनको पूर्वतयारी र प्रतिकार्यसम्बन्धी तालिमबाट सिकेका ज्ञान र रैथाने सीपका आधारमा क्षति न्यूनीकरणमा जोड दिनुभयो ।
इन्स्टिच्युट अफ हिमालयन रिस्क रिडक्सन (आइएचआरआर)का कार्यकारी निर्देशक इञ्जिनियर सुरज गौतम, आयोजक संस्था सजग समाज परियोजनाको कार्यक्रम संयोजक सुनिलकुमार साह, विपद् जोखिम न्यूनीकरण राष्ट्रिय कार्यमञ्चका सदस्यसचिव डा राजु थापा, अवकाशप्राप्त सहायक रथी जीतबहादुर गुरुङलगायतका वक्ताहरूले विपद्जन्य घटनाका कारण हुने सम्भावित बहुप्रकोपीय जोखिम न्यूनीकरण तथा रोकथामका लागि सम्बद्ध क्षेत्रका अन्तरनिकाय संयन्त्रलाई समान्वयात्मक ढङ्गबाट अझ प्रभावकारी, व्यवस्थित, चुस्तदुरुस्त र जवाफदेही बनाउनुपर्नेमा जोड दिनुभयो ।