काठमाडौँ, ९ पुसः आमजनता पार्टी (आजपा)का अध्यक्ष प्रभु साहले ऐतिहासिक जेनजी जनविद्रोहलाई यथास्थितिमा परिणत गर्ने षड्यन्त्र भइरहेको आरोप लगाउनुभएको छ ।
आमजनता पार्टीको केन्द्रीय कमिटीको पूर्ण बैठकलाई आज सम्बोधन गर्दै अध्यक्ष साहले मुलुक गम्भीर सङ्कटतर्फ धकेलिँदै गएको तर्क गर्नुभयो ।
अध्यक्ष साहले भ्रष्टाचार, बेथिति र दलीय अत्याचार मौलाउँदै जाँदा जनआन्दोलन कमजोर पार्ने प्रयास भइरहेको उल्लेख गर्नुभयो । उहाँले भन्नुभयो, “जेनजी जनविद्रोह यथास्थितिमा परिणत नहोस् ।” उहाँका अनुसार यही अवस्थाविरुद्ध तेस्रो जनआन्दोलनको स्पष्ट रणनीति तय गर्न बैठक आह्वान गरिएको हो ।
बैठकमा समसामयिक राजनीति, सङ्गठन सुदृढीकरण, आगामी कार्ययोजना र आन्दोलनको स्वरूपबारे छलफल भइरहेको पार्टीका प्रवक्ता चन्द्र भुषण साहले जानकारी दिनुभयो ।