भक्तराज आचार्य र केशव दाहालको उपन्यास मोक्षभूमि
वि.सं २०७७ सालको पद्मश्री साहित्य पुरस्कार लेखक केशव दाहालको उपन्यास ‘मोक्षभूमि’ लाई दिने निर्णय भएको छ ।
त्यस्तै पद्मश्री साधना सम्मान गायक तथा सङ्गीतकार भजन शिरोमणि भक्तराज आचार्यलाई अर्पण गर्ने निर्णय गरिएको छ । पद्मश्री साहित्य पुरस्कार र पद्मश्री साधना सम्मान दुवैको राशी रु तीन—तीन लाख रहेको छ । खेमलाल हरिकला लामिछाने समाज कल्याण प्रतिष्ठानले उक्त पुरस्कार दिने निर्णय गरेको हो ।
वि.सं २०६३ सालदेखि प्रतिष्ठानले नेपाली साहित्यमा वर्षभरि प्रकाशित पुस्तकमध्ये निर्णायक मण्डलले उत्कृष्ट ठहर्याएको पुस्तकलाई प्रत्येक वर्ष पद्मश्री साहित्य पुरस्कार अर्पण गर्दै आएको छ ।
दुवै सम्मान तथा पुरस्कार प्रत्येक वर्ष कोजाग्रत पूर्णिमाको दिन अर्पण गरिँदै आएकामा यस वर्ष विषम परिस्थितिका कारण यसै वर्षभित्र अनुकूल समयमा अर्पण गरिने अध्यक्ष जीवा लामिछानेले जानकारी दिएका छन् ।