काठमाडौं– टेस्ला कम्पनीका प्रमुख एलन मस्कले ट्विटर खरिद सम्झौतालाई स्थगित गरेका छन् । मस्कले ट्विट गर्दै ट्विटर खरिद सम्झौता छोटो समयका लागि स्थगित गरिएको जनाएका हुन् ।
ट्विटरमा ५ प्रतिशत भन्दा कम ‘स्पाम’ तथा ‘फेक’ अकाउन्टबारे विस्तृत विवरणको अपेक्षासहित ट्विटर खरिद सम्झौतालाई स्थगित गरिएको उनको भनाइ छ ।
फेक अकाउण्टहरुले कन्टेन्ट पोष्ट गर्ने समस्या ट्विटरले लामो समयदेखि झेल्दै आएको छ । मस्कले ट्विटरबाट फेक अकाउण्टहरुलाई हटाउनुपर्ने बताउँदै आएका छन् ।
झण्डै दुई साताअघि ट्विटरले दैनिक प्रयोगकर्तामध्ये केबल ५ प्रतिशत मात्रै फेक अकाउण्ट रहेको जनाएको थियो । यद्यपि यस्ता अकाण्टको संख्या धेरै हुनसक्ने ट्विटरले स्वीकार गरेको थियो ।
मस्कको घोषणा लगत्तै ट्विटरको शेयर मूल्यमा २५ प्रतिशतको गिरावट आएको बीबीसीले जनाएको छ । मस्कले ट्विटर खरिद सम्झौता रद्द गरेको खण्डमा उनले १ अर्ब अमेरिकी डलर ट्विटरलाई तिर्नुपर्ने प्रावधान रहेको बीबीसीले जनाएको छ ।