अछामको रामारोशन गाउँपालिकाका अध्यक्ष मानबहादुर साउँदले कार्यालय सहायकसरहको तलब–सुविधा पाउने गरी श्रीमती जयसरा साउँदलाई भान्सेमा नियुक्त गरेका छन् ।
अध्यक्ष साउँदको सिफारिसमा जयसरालाई करारमा नियुक्ति दिइएको गाउँपालिकाले जनाएको छ । नियुक्तिपत्रमा गाउँपालिकाका प्रशासकीय अधिकृत रामबहादुर भण्डारीको हस्ताक्षर छ । जेठ १५ गतेदेखि लागू हुनेगरी ६ महिनाको करार सम्झौता गरिएको भण्डारीले बताए ।
‘विश्वासिलो व्यक्ति भान्से राख्न पाउनुहुन्छ भनेका थियौँ, उहाँले आफ्नै श्रीमतीको नाम दिनु भयो’ भण्डारीले भने ‘उहाँकै सिफारिसका आधारमा भान्से नियुक्त गरिएको हो ।’
करार सम्झौताअनुसार भान्सेका रूपमा गाउँपालिका अध्यक्षकी श्रीमतीले मासिक २१ हजार ३ सय पारिश्रमिक, वार्षिक १० हजार पोसाक भत्ता र चाडपर्वमा वर्षमा एक पटक एक महिनाको पारिश्रमिक प्राप्त गर्नेछिन् ।
भान्सेका रूपमा नियुक्त गरिएकी जयसरा समितिहरूको अनुगमनमा पनि जाने करार सम्झौतामा उल्लेख छ । यसरी अनुगमनमा जाँदा उनले दैनिक भत्ता बेग्लै पाउनेछिन् । कार्यालय कामको सिलसिलामा कुनै भ्रमणमा जाँदा भ्रमण खर्च भुक्तानी दिने गरी सम्झौता भएको छ ।