राँझा (बाँके), ३ वैशाख : युरोपियन युनियन र नेपालबीच दौत्यसम्बन्ध स्थापना भएको ५० वर्षका अवसरमा नेपालगञ्जमा ‘नेपाल–युरोपियन युनियन’ फिल्म महोत्सव आयोजना गरिएको छ ।    
    
 आज बिहान १० बजेदेखि साँझ ६ बजेसम्म स्थानीय बाटिका होटलमा आयोजित महोत्सवमा चार वटा लघुनेपाली चलचित्र र तीन वटा प्रोपेली चलचित्र प्रदर्शन हुने नेपालका लागि युरोपियन युनियनका उपप्रमुख डा जोएल इभोनेटले जानकारी दिनुभयो ।    
    
 महोत्सव युनियन र नेपालको दौत्यसम्बन्ध स्थापना भएको ५० औँ वर्ष भएकाले आयोजना गरिएको हो । महोत्सवको नारा ‘युरोपियन युनियन–नेपाल सम्बन्धको पचास वर्ष सांस्कृतिक विविधताको उत्सव’ रहेको छ ।    
    
 “युरोपियन युनियन र नेपालको दौत्य सम्बन्धको ५० औँ वार्षिकोत्सव मनाउन र युरोपको विविधतापूर्ण संस्कृति, जीवनशैली र सिनेम्याटीक सिर्जनशीलता काठमाडौँ, लुम्बिनी, कर्णाली र सुदूरपश्चिमका नेपाली दर्शकसँग आदानप्रदान गर्न पाउँदा म अत्यन्त हर्षित छु”, उपप्रमुख इभोनेटले भन्नुभयो ।    
    
 योसँगै यही वैशाख ४ गते बिहान ११ देखि १ बजेसम्म मध्यपश्चिम बहुमुखी क्याम्पसमा चलचित्र निर्देशक तथा लेखक मोहन राईद्वारा फिल्म एप्रिसिएशनबारे मास्टरक्लास गरिनेछ भने उपप्रमुख डा इभोनेटद्वारा दुई देशबीचको दौत्यसम्बन्ध र विकास सहकार्यबारे नेपालगञ्ज बहुमुखी क्याम्पसमा बिहान ९.३० बजेदेखि १०.३० बजेसम्म व्याख्यान गर्ने कार्यक्रम रहेको छ ।    
 उक्त कार्यक्रममा नौ वटा युरोपियन र १२ नेपाली लघु चलचित्र प्रदर्शित हुनेछन् । महोत्सव तथा कार्यक्रमका लागि लघु चलचित्र छनोट गर्न चलचित्र निर्देशकका लागि लघु चलचित्र प्रतिस्पर्धा आयोजना गरिएको थियो । प्रतिस्पर्धामा ५२ वटा लघु चलचित्र समावेश भएकामध्ये १२ वटा छनोट गरिएको हो ।    
    
 चुनिएका नौ वटा युरोपेली चलचित्रमध्ये नेपालगञ्जमा मेरियन ब्लिचर निर्देशित मिस भिर्वोग (डेनमार्क), इम्यानुएल परभु निर्देशित मिकादो (रोमानिया, चेज रिपब्लिक), एन्टोनियो लुकीच निर्देशित लक्जेम्बर्ग लक्जेम्बर्ग (युक्रेन) प्रदर्शित गरिने छ भने १२ वटा लघु नेपाली चलचित्रमध्ये शान्ता नेपाली निर्देशित ध्येय ड्रिम्स, रजिन महर्जन निर्देशित लेट्स टक् पिरियड, आकाङ्क्षा कार्की निर्देशित सनाइ र अनिल कुमी निर्देशित फेरा प्रदर्शित हुनेछन् ।    
    
 नियुफको १३ संस्करणअन्तर्गत बागमती प्रदेशको काठमाडौँ र सुदूरपश्चिम प्रदेशको महेन्द्रनगरमा महोत्सव सफलतापूवर्क सम्पन्न भइसकेको छ भने नेपालगञ्जपछि कर्णाली प्रदेशको सुर्खेतमा पनि आयोजना गरिनेछ ।