बागलुङ, जिल्ला प्रहरी कार्यालय बागलुङले बेवारिसे अवस्थामा २२ नाल भरुवा बन्दुक फेला पारेको छ । आइतबार दिउँसो प्रहरी चौकी बुङगादोभान बागलुङबाट खटिएको प्रहरीको गस्ती टोलीले २२ नाल भरुवा बन्दुक फेला पारेको जिल्ला प्रहरी कार्यालय बागलुङका सूचना अधिकारी तथा प्रहरी नायव उपरीक्षक इकवाल हवारीले जानकारी दिनुभयो ।
बागलुङको तमानखोला गाउँपालिका–४ लाममेलास्थित घट्टेखोला नजिकै रहेको ओडारमा एक नाले भरुवा बन्दुक १२ नाल र तमानखोला–३ मार्के खोलाको ओडारमा एक नाले १० नाल बन्दुकहरू फेला परेको हवारीले जानकारी दिनुभयो ।
प्रहरीले भरुवा बन्दुकसहित स्थानीयलाई पक्राउ गर्दै आएपछि स्थानीयले डराएर ओडारमा लुकाइ राखेको हुन सक्ने प्रहरीको भनाइ छ । ओडारमा भरुवा बन्दुक लुकाइछिपाइ राख्नेहरूका बारेमा थप अनुसन्धान थालिएको हवारीको भनाइ छ ।