काठमाडौँ, ५ असारः राष्ट्रियसभाको बैठकमा सांसदहरूले प्रदेश र स्थानीय सरकारलाई केन्द्र सरकारले उचित बजेट विनियोजन नगरेकाप्रति सरकारको ध्यानाकर्षण गराएका छन् ।
राष्ट्रियसभाको आजको प्रादेशिक समयमा आफ्ना धारणा राख्दै कांग्रेसका सांसद नारायणदत्त भट्टले बजेट विनियोजन गर्दा न्यायोचित नभएको र स्थानीय तहलाई उचित ढङ्गले बजेट विनियोजन नभएको टिप्पणी गर्नुभयो ।
सांसद दत्तले प्राकृतिक न्यायको सिद्धान्तका आधारमा पनि आवश्यकताका आधारमा न्यायोचित बजेट वितरण गर्नुपर्नेमा जोड दिँदै सरकारले बजेट विनियोजन गर्दा ध्यान दिनुपर्नेमा जोड दिनुभयो ।
नेपाल कम्युनिष्ट पार्टीका सांसद मदनकुमारी शाहले सुदूरपश्चिम, कर्णाली र मधेसलाई सरकारले जति प्राथमिकता दिनुपर्ने हो त्यो नदिएर प्रशासनिक खर्चसमेत कटौती गर्ने काम गरेकाप्रति सरकारको ध्यानाकर्षण गराउनुभयो ।
उहाँले सङ्घीयता कार्यान्वयनका लागि अहिले पनि कानुनको प्रभावकारी कार्यान्वयन नहुँदा प्रदेशका स्रोत साधनको व्यवस्थापनमा समेत कठिनाइ भएको बताउनुभयो ।
नेकपा (एमाले) प्रेमप्रसाद दङ्गालले सङ्घ, प्रदेश र स्थानीय तहको साझा अधिकार सूचीका विषयहरू तय गरिएको भए पनि प्रदेश र स्थानीय तहलाई अधिकार हस्तान्तरण प्रभावकारी हुन नसक्दा विकास निर्माणमा ढिलाइ भएको बताउनुभयो । उहाँले कर्मचारी व्यवथापनमा समेत कठिनाइ भएको र कर्मचारी पठाए पनि प्रदेश र स्थानीय तहमा लामो समय नबस्ने गरेको पाइएको विषय उठाउनुभयो ।
जनता समाजवादी पार्टी नेपालका सांसद मोहम्मद खालिदले सङ्घीयता कार्यान्वयनका विषयमा सरकारले ध्यान नदिएको भन्दै प्रदेश र स्थानीय तहले आसन पाए पनि शासन नपाएको गुनासो गर्नुभयो । उहाँले बजेट विनियोजन गर्दा पनि सङ्घकै अधिकार बढी राखिएको प्रदेश र स्थानीय तहले माग्नुपर्ने अवस्था हुनु दुःखद् भएको बताउनुभयो ।
नेपाली कांग्रेसका सांसद विष्णुकुमारी सापकोटाले लुम्बिनी प्रदेश सरकारले चार तरिकाले स्थानीय तहलाई अधिकार हस्तान्तरण गरेको भन्दै स्थानीय तहलाई केन्द्र सरकारले बजेट कटौती गरेको भन्दै सरकारको ध्यानाकर्षण गराउनुभयो ।
नेपाल कम्युनिष्ट पार्टीका सांसद सुरेशकुमार आलेमगरले गण्डकी प्रदेशका लागि आवश्यक पर्ने जरुरी कानुन पनि नबनेको हुनाले काम कारबाहीमा कठिनाइ हुनुका साथै कर्मचारीको कमीका कारण काम गर्नसमेत समस्या परेको सुनाउनुभयो ।
नेकपा (एमाले) सम्झना देवकोटाले सङ्घीयता शक्तिको विकेन्द्रीकरण गर्ने निकाय भए पनि तर सङ्घीयताको प्रभावकारी कार्यान्वयन हुन नसकेको बताउनुभयो । सङ्घीयता धेरै खचिलो हुने भनिए पनि उहाँले सङ्घले भन्दा प्रदेश र स्थानीय तहले कम खर्च गरेको तथ्याङ्कहरूले देखाएको बताउनुभयो ।
नेपाली कांग्रेसका सांसद धमेन्द्र पासवानले अन्नदाता, करदाता र मतदाता भएको स्थान मधेस प्रदेशमा मानवअधिकारको अवस्था कमजोर, मानव विकास सूचाङ्कमा सबैभन्दा पछाडि रहेको र शिक्षा तथा स्वास्थ्यमा समेत कमजोर रहेको बताउनुभयो ।
नेपाल कम्युनिष्ट पार्टीका सांसद घनश्याम रिजालले बागमती प्रदेशभित्र विभिन्न महत्त्वपूर्ण राजमार्गहरू काम भइरहेको र काम भने अत्यन्तै सुस्तगतिमा भएकोप्रति सरकारको ध्यानाकर्षण गराउँदै पुनर्निर्माणमा विशेष ध्यान दिन आग्रह गर्नुभयो । उहाँले जनताको सुरक्षालाई ध्यानमा राखेर वर्षायाम सुरु भइसकेकाले पुलहरू यथाशीघ्र निर्माणमा गर्न माग गर्नुभयो ।
नेकपा (एमाले)का सांसद सोमनाथ पोर्तेलले कोशी प्रदेशमा झापाले प्रधानमन्त्री नै बनाएर पठाएको प्रदेश भएको र चिया उत्पादनको बढीभन्दा महत्त्वपूर्ण जिल्लामा अहिले चिया उद्योग बन्द भएको हुनाले तत्काल समाधान खोज्न सरकारलाई आग्रह गर्नुभयो ।
–––