तुलसीपुर (दाङ), १७ असारः पातुखोलाका स्थानीयले यहाँका लागुऔषध दुर्व्यवसनीलाई न्यूनीकरण गर्न सफल भएका छन् ।
त्यसो त ! दुव्यर्सनी न्यूनीकरण मात्र होइन, समाजमा अन्य विकृतिजन्य क्रियाकलाप गर्नेलाई पक्राउ गरी प्रहरीलाई बुझाउन थालेपछि दुर्व्यवसनी तथा समाजमा गैरकानुनी काम गर्नेको सङ्ख्या न्यूनीकरण हुँदै गएको हो ।
यसअघि यहाँ हुने झै–झगडा, कुटपिटजस्ता गैरगतिविधि हुनेगरेको थियो । अहिले हरेक साँझ समुदायका नागरिक एकजुट भएर गस्ती गर्छन् । जसल गर्दा समाजमा अनधीकृत कार्य कम हुँदै गइरहेका छन् ।
तुलसीपुर उपमहानगरपालिका–५ मा पर्ने सोही ठाउँका १० वटा टोलका नागरिक मिलेर त्यस्ता गतिविधि न्यूनीकरण गर्न अभियान सञ्चालन गरेका स्थानीय वीरेन्द्र विकले बताउनुभयो ।
उहाँले भन्नुभयो, “हामीले हरेक साँझ यो अभियान चलाइरहेका छौँ”, “जसले गलत प्रवृत्तिका मान्छे गाउँमा छिर्न सक्दैनन् ।”
गाउँ नजिकै बसपार्क छ । जसले अनधिकृत गतिविधि बढेको थियो । ज्ञानज्योति आधारभूत विद्यालयका प्रधानाध्यापक मेघराज घिमिरेले बताउनुभयो । उहाँले गस्तीका कारण घरमा निदाउने वातावरण तयार भएको बताउनुभयो ।
गत वर्ष फागुन ७ गतेदेखि सुरु भएको यो अभियान निरन्तर सञ्चालन भइरहेको छ ।
यस्ता अभियान समुदायस्तरबाट सञ्चालन भएमा त्यसले समाजलाई सही मार्गमा लैजाने तुलसीपुर उपमहानगरपालिकाका प्रमुख टीकाराम खड्काले बताउनुभयो ।
“समाजलाई सही मार्गमा लैजाने जिम्मेवारी समुदायको पनि हो”, उहाँले भन्नुभयो, “त्यसका लागि समाज मिलेर यस्ता कार्य निरन्तर गर्न आवश्यक हुन्छ ।”