काठमाडौँ, १६ असोजः राष्ट्रियसभाको आजको बैठकमा सांसदहरूले हवाई यात्रुलाई सुरक्षित, भरपर्दो र गुणस्तरीय सेवा उपलब्ध गराउन तथा दुर्घटना, उडान स्थगन र यात्रा अवरोधबाट यात्रु तथा तेस्रो पक्षमा पुग्ने क्षतिको दायित्व सुनिश्चित गर्न ‘आन्तरिक वायुसेवा दायित्वसम्बन्धी विधेयक २०८३’ कार्यान्वयनमा ल्याउनुपर्नेमा जोड दिनुभएको छ ।
बैठकमा विधेयकमाथिको छलफलमा भाग लिँदै सांसद खम्मबहादुर खातीले आन्तरिक वायुसेवालाई सुरक्षित, भरपर्दो, गुणस्तरीय तथा जिम्मेवार बनाउन विधेयक महत्त्वपूर्ण रहेको बताउनुभयो । हवाई यात्रुको अधिकार संरक्षण गर्दै दुर्घटनाबाट हुने चोटपटक, अङ्गभङ्ग तथा मृत्यु र उडान निलम्बन वा यात्रा स्थगनका कारण यात्रु, मालसामान तथा तेस्रो पक्षमा पुग्न सक्ने क्षतिसम्बन्धी कानुनी व्यवस्था गर्न विधेयक ल्याइएको उहाँले उल्लेख गर्नुभयो ।
सांसद रामकुमारी झाँक्रीले कानुनलाई भावनाभन्दा कार्यान्वयनयोग्य बनाउनुपर्ने बताउनुभयो । वायुसेवा कम्पनीलाई जिम्मेवार बनाएर यात्रुको सुरक्षाको प्रत्याभूति गर्नु आवश्यक रहेको उहाँको भनाइ छ । विधेयकले नेपाली आकाश सुरक्षित छ भन्ने विषयमा सम्बोधन गर्ने सांसद झाँक्रीले विश्वास व्यक्त गर्नुभयो । विधेयकमाथि समितिले गरेका संशोधनमा सरकारले सकारात्मक सहयोग गरेको उल्लेख गर्दै उहाँले विधेयक पारित गरी कार्यान्वयन गर्नुपर्नेमा जोड दिनुभयो ।
सांसद विष्णुबहादुर विश्वकर्माले हवाई सेवामा गर्भवती, बालबालिका, अपाङ्गता भएका व्यक्ति, विपन्न, असहायलगायतलाई प्राथमिकता दिने विषय विधेयकमा समेटेको बताउनुभयो । व्यापक छलफलपछि विधेयक आएको उल्लेख गर्दै उहाँले यसलाई पारित गर्न आग्रह गर्नुभयो ।
सांसद सम्झना देवकोटाले विधेयकमा तोकिएका मापदण्डलाई व्यावहारिक बनाउनुपर्ने बताउनुभयो । सेवा तथा मापदण्डसम्बन्धी सूचना वेबसाइटमा मात्रै नभई नेपाल राजपत्र तथा स्थानीय पत्रपत्रिकामार्फतसमेत सार्वजनिक गर्नुपर्ने उहाँको सुझाव छ ।
सांसद विष्णुकुमारी सापकोटाले हवाई सेवा नियमित नहुँदा यात्रुले विमानस्थलमा लामो समय कुर्नुपर्ने, बास बस्नुपर्ने तथा फर्किनुपर्ने अवस्था रहेको बताउनुभयो । दुर्गम क्षेत्रमा मौसम तथा अन्य कारणले नियमित हवाई सेवा सञ्चालन हुन नसक्दा नागरिकले थप कठिनाइ भोग्नुपरेको उहाँको भनाइ छ । दुर्घटनामा मृत्यु भएका यात्रुका परिवारले वर्षौँसम्म पनि क्षतिपूर्ति नपाउने अवस्था अन्त्य गर्नुपर्नेमा जोड दिँदै उहाँले विधेयकलाई व्यवस्थित रूपमा अघि बढाएर शीघ्र कानुन निर्माण गर्नुपर्ने बताउनुभयो ।
सांसद सोमनाथ पोर्तेलले विमानस्थलमा उडान तालिका व्यवस्थापनमा देखिने कमीकमजोरीलाई नियन्त्रण गर्न विधेयकले सहयोग गर्ने विश्वास व्यक्त गर्नुभयो । उडानको समय केही मिनेट फरक पारेर समेत तालिका बनाउने गरिएको उल्लेख गर्दै उहाँले व्यवस्थित उडान तालिका आवश्यक रहेको बताउनुभयो ।
---