गण्डकी, २१ असोजः पोखरामा आगलागीजन्य विपद् व्यवस्थापन तथा उद्धारसम्बन्धी संयुक्त अभ्यास गरिएको छ । जिल्ला सुरक्षा समिति, कास्की र रेष्टुरेन्ट एण्ड बार एशोसिएसन नेपाल (रेवान), पोखराको आयोजना तथा नेपाल रेडक्रस सोसाइटी, कास्कीको सहयोगमा बुधबार पोखरा महानगरपालिका–७ स्थित कोमागाने उद्यानमा नमूना उद्धार अभ्यास गरिएको हो ।
नेपाली सेना, सशस्त्र प्रहरी बल, नेपाल प्रहरी, रेडक्रसकर्मी, स्वास्थ्यकर्मी, स्वयंसेवकलगायतको सहभागितामा आगलागी नियन्त्रण, व्यवस्थापन तथा उद्धार सम्बन्धी कृत्रिम अभ्यास गरिएको कास्कीका सहायक प्रमुख जिल्ला अधिकारी चित्राङ्गत बरालले जानकारी दिनुभयो ।
सुरक्षाकर्मीलाई आगलगीजन्य विपद्को उद्धार कार्यमा दक्ष र सीपयुक्त बनाउन नमूना अभ्यास आयोजना गरिएका उहाँको भनाइ छ । उक्त अवसरमा सुरक्षाकर्मीले खाना पकाउने एलपी ग्यासमा लाग्ने आगलागी नियन्त्रणका उपायबारे अभ्याससहित होटल तथा रेष्टुराँमा काम गर्ने कर्मचारीसहित सर्वसाधारणलाई जानकारी गराएका थिए ।
आगलागी नियन्त्रणमा यन्त्र, उपकरणको प्रयोग, मानवसंसाधन परिचालन, आगलागी नियन्त्रण, घाइतेको उद्धार तथा प्राथमिक उपचारलगायतको कृत्रिम अभ्यास गरिएको थियो । सुरक्षाकर्मीले आगलागी नियन्त्रण तथा उद्धार कार्यमा प्रयोग भइरहेका नयाँनयाँ सीप र प्रविधिको प्रदर्शन गरेका थिए ।
जिल्ला सुरक्षा समितिका अध्यक्ष एवं प्रमुख जिल्ला अधिकारी कुमानसिंह गुरुङले नमूना अभ्यासले आगलागीका घटना न्यूनीकरण तथा व्यवस्थापनमा पूर्वतयारीसँगै जनस्तरमा सचेतना अभिवृद्धि हुने बताउनुभयो । पोखरा पर्यटकीय राजधानीसमेत भएकाले यस सहर हरेक हिसाबले सुरक्षित छ भन्ने सन्देश अन्तरराष्ट्रिय जगत्मासमेत पुर्याउनुपर्ने प्रजिअ गुरुङले बताउनुभयो ।
विपद्सम्बन्धी सम्भावित घटनाको उद्धार तथा कृत्रिम अभ्यासमार्फत आमनागरिकमा सचेतना अभिवृद्धि हुने विश्वास लिइएको उहाँको भनाइ छ । जिल्ला सुरक्षा समितिले नेपाली सेना, नेपाल प्रहरी, सशस्त्र प्रहरी बललगायत सम्बद्ध सङ्घसंस्थासँगको समन्वय र सहकार्यमा प्रत्येक वर्ष विपद् पूर्वतयारी तथा कृत्रिम अभ्यास कार्यक्रम सञ्चालन गर्दै आएको छ ।
उक्त अवसरमा रेष्टुरेन्ट एण्ड बार एसोसिएसन नेपाल (रेवान)का तर्फबाट जिल्ला विपद् व्यवस्थापन समितिलाई ११ थान आगो निभाउने यन्त्र (फायर एक्स्टिङ्गुइसर) र ११ थान ‘फाइर ब्ल्याङ्केट’ प्रदान गरिएको थियो । ‘रेवान’ पोखराका अध्यक्ष वसन्त गौतमले विपद् जोखिम न्यूनीकरण तथा व्यवस्थापनमा समाजका सबै पक्षको एकताबद्ध पहल आवश्यक हुने बताउनुभयो ।
---