नेटोले वैचारिक पूर्वाग्रह त्यागी अन्तरराष्ट्रिय एवं क्षेत्रीय सुरक्षा कायम गर्न थप काम गर्नुपर्ने चिनियाँ विदेश मन्त्रालयले जनाएको छ।
‘विश्वको सबैभन्दा ठूलो सैन्य गठबन्धनको रूपमा नेटोले शीतयुद्धको मानसिकता र वैचारिक पूर्वाग्रह त्याग्नुपर्छ, अन्तरराष्ट्रिय र क्षेत्रीय सुरक्षा एवं स्थायित्व कायम गर्न थप प्रयास गर्नुपर्छ’, मन्त्रालयले सुरक्षा ग्यारेन्टीमा रूसको प्रस्तावमा टिप्पणी गर्दै उक्त कुरा बताएको स्पुतनिकले लेखेको छ।
डिसेम्बर १७ मा रूसी विदेश मन्त्रालयले रूस‚ अमेरिका र नेटोबीच सुरक्षा ग्यारेन्टीमा मस्यौदा सम्झौता प्रकाशित गरेको छ।
यस सम्बन्धी कागजात पहिले नै अमेरिका र यसका सहयोगीलाई हस्तान्तरण गरिएको छ। रूसी उपविदेशमन्त्री सर्गेई र्याबकोभले नेटो र अमेरिकाले सुरक्षा ग्यारेन्टीका लागि रूसको मागलाई जवाफ नदिए नयाँ टकराव निम्त्याउन सक्ने चेतावनी दिएका छन्।