नयाँ दिल्ली, ३ साउन: भारतमा आयोजित एक धार्मिक भेलामा भएको घातक भागदौडमा एक सय २० भन्दा बढी मानिसहरुको ज्यान गएको घटनाको समिक्षा गर्दै एक भारतीय प्रवचकले भाग्यलाई चुनौती दिन नसकिने र मृत्यु अपरिहार्य रहेको बताउनुभएको छ ।
उत्तरी सहर हाथरसमा आयोजित हिन्दु धार्मिक सभामा जुलाई २ मा भएको भागदौडमा एक सय २१ जनाको मृत्यु भएपछी पहिलो पटक सञ्चारमाध्यमसमक्ष प्रस्तुत भएका प्रवचक भोलेबाबाले आफू यो त्रासदीबाट दुखी भएको बताउनुभयो ।
“जे भयो त्यसबाट म धेरै दुखी छु, तर भाग्यलाई कसले चुनौती दिन सक्छ र ? जो कोही पनि यस पृथ्वीमा आउँछ उसले एक दिन जानैपर्छ” उहाँले भन्नुभयो ।
प्रहरी कन्स्टेबलबाट प्रचारक बन्नुभएको बाबाले बुधबार भागदौड भएको स्थानबाट करिब ६० किलोमिटर टाढाको कासगञ्जमा रहेको धार्मिक मठबाट स्थानीय सञ्चारमाध्यमसँग कुरा गर्नुभएको हो ।
बाबाका वकिलले यसअघि भिडमा रहेका असामाजिक तत्वहरु घटनाको जिम्मेवार रहेको बताएका थिए।
प्रवचनमा २ लाख पचासँ हजार भक्तहरू उपस्थित थिए । यद्यपी ८० हजार जनालाई मात्र सहभागी गराउन पाइने अनुमति आयोजकहरुसँग थियो ।
मृत्यु भएका मध्ये अधिकांश महिला थिए ।
भागदौडपछि जारी गरिएको प्रहरी प्रतिवेदनका अनुसार उक्त कार्यक्रमका मुख्य आयोजकहरूलाई पक्राउ गर्न खोजिएको थियो, तर भोलेबाबालाई पक्राउ गर्न सकिएको थिएन ।
अहिलेसम्म उहाँका ११ जना स्वयंसेवकलाई भने पक्राउ गरिएको छ ।
भारतमा धार्मिक जमघटहरूमा कमजोर भीड व्यवस्थापन र सुरक्षा त्रुटिहरूले गर्दा यस्ता घातक घटनाहरू सामान्य छन् ।
सन् २००८ मा उत्तरी सहर जोधपुरको पहाडी मन्दिरमा भएको भागदौडमा २२४ तीर्थयात्रीको मृत्यु भएको थियो भने ४०० भन्दा बढी घाइते भएका थिए ।