काठमाडौँ, २० असोजः वैदेशिक रोजगारीका लागि विभिन्न देश पठाइदिने प्रलोभन देखाएर लाखौँ रुपैयाँ ठगी गरेको आरोपमा प्रहरीले चार जनालाई पक्राउ गरेको छ ।
काठमाडौँ उपत्यका अपराध अनुसन्धान कार्यालयको टोलीले स्पेन, रोमानिया, न्युजिल्याण्ड र बेलायत पठाइदिने भन्दै पीडितबाट ठूलो रकम लिएर सम्पर्कविहीन भएका उनीहरुलाई काठमाडौँबाट पक्राउ गरेको हो ।
पक्राउ पर्नेमा काठमाडौँका दीपेन्द्र दाहाल, धादिङका रमेश दनै, बागलुङका युवराज रिजाल र रोल्पाका वीरसिंह बाठा छन् । प्रहरीका अनुसार दाहालले स्पेन पठाइदिने भन्दै रु ३५ लाख ९४ हजार लिएका थिए ।
त्यसैगरी, दनैले रोमानिया पठाइदिने भन्दै रु दुई लाख, रिजालले न्युजिल्याण्ड पठाइदिने भन्दै रु चार लाख र बाठाले बेलायत पठाइदिने भन्दै रु १६ लाख ७८ हजार रकम उठाएको उजुरी परेको थियो ।
रकम लिएर सम्पर्कविहीन भएको भन्दै पीडितले प्रहरीमा उजुरी दिएपछि उनीहरूलाई पक्राउ गरिएको प्रहरी उपरीक्षक रामेश्वर कार्कीले जानकारी दिनुभयो । पक्राउ परेका चारै जनालाई थप अनुसन्धान तथा आवश्यक कानुनी कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ ।