काठमाडौँ, १६ असोजः प्रधान सेनापति अशोकराज सिग्देलले विपद्का घटनापछिको खोज तथा उद्धारमा सकलदर्जाले देखाएको उच्च पेसागत दक्षता तथा व्यावसायिकताप्रति धन्यवाद ज्ञापन गर्नुभएको छ । जङ्गी अड्डामा आज पृतनापति समन्वयात्मक बैठकको समापन गर्दै उहाँले प्राप्त जिम्मेवारीलाई आगामी दिनमा समेत कुशलतापूर्वक निर्वाह गर्न निर्देशन दिनुभयो ।

    बिहीबारदेखि सञ्चालन भएको बैठकमा सम्पादन भएका कार्यको समीक्षा, वर्तमान परिस्थितिको विश्लेषण, विपद् प्रतिकार्यलगायत समसामयिक विषयमा छलफल भएको सैनिक जनसम्पर्क तथा सूचना निर्देशनालयले जनाएको छ । बैठकको समापन कार्यक्रममा बलाधिकृत, रथीवृन्दलगायत अधिकृतहरूको उपस्थिति थियो ।