जनकपुरधाम, १७ असोज : जनकपुरधामस्थित जानकी मन्दिरबाट भारतको देहरादूनसम्मको करिब तीन हजार किलोमिटर लामो अन्तरराष्ट्रिय साइकल यात्रा आजदेखि शुभारम्भ भएको छ । भारत सरकारका पद्मभूषण सम्मान प्राप्त डा अनिलप्रकाश जोशीको नेतृत्वमा भारतबाट आएको २० सदस्यीय टोलीले जानकी मन्दिरबाट साइकल यात्रा सुरु गरेको हो ।
कमला बचाउ अभियानको समन्वयमा सुरु भएको साइकल यात्राको आज मधेश प्रदेशका प्रदेश प्रमुख सुरेन्द्र लाभ कर्णले शुभारम्भ गर्नुभयो । कार्यक्रममा खानेपानी, सिँचाइ तथा ऊर्जामन्त्री जवाहरलाल कुशवाहा र पर्यटनमन्त्री कनिष्क पटेलको समेत सहभागिता रहेको थियो ।
जलवायु परिवर्तन, ग्लोबल वार्मिङ तथा वातावरण प्रदूषण न्यूनीकरणसँगै जल संरक्षण, जल, जीवन र नदी संस्कृतिको संरक्षण तथा प्रवर्द्धन गर्ने उद्देश्यले अन्तरराष्ट्रिय साइकल यात्रा आयोजना गरिएको कमला बचाउ अभियानका सचिव बिनोद महराले जानकारी दिनुभयो । नेपालबाट सुरु भएको यो अन्तरराष्ट्रिय साइकल यात्राले नेपाल भारतबीचको पर्यावरणीय, सांस्कृतिक तथा मैत्रीपूर्ण सम्बन्धलाई थप मजबुत बनाउने विश्वास व्यक्त गरिएको छ ।