अभिनेता विपिन कार्की बलिउड फिल्म ‘एनिमल’मा चाँडै अभिनय गर्दैछन् । उनी यो फिल्ममा अभिनयका लागि आगामी जुलाई, अगष्टमा मुम्बई जाँदैछन् । फिल्ममा उनको अधिकांश दृश्य अभिनेता अनिल कपुरसँग हुनेछ ।
विपिन आफैं अभिनेता अनिलको फ्यान हुन् । विपिनले अनिल अभिनित फिल्म ‘मिष्टर इण्डिया’ देखि लिएर ‘वेलकम’ सम्म हेरेका छन् । उनकै भनाईमा अनिलको फिल्म नछुटाई हेर्छन् ।
‘निर्माण पक्षले मलाई ‘एनिमल’को भूमिकाबारे विस्तृत बताएको छैन । तर अधिकांश भूमिका अनिल कपुरसँग छ भनिएको छ’, विपिनले खबरहबसँग भने, ‘अनिल कपुरको विशेषता के हो भने उहाँ कुनै न कुनै कोणबाट आफ्नो छाप छोडिरहनुहुन्छ । ठूलो होस् वा सानो भूमिका, जुनसुकै चरित्रमा पनि उहाँले छाप छोड्नुभएको छ ।’
विपिनका अनुसार अनिलको अभिनयबाट उनी प्रभावित भन्दा पनि उनको अभिनय शैलीको फ्यान हुन् । ‘उहाँको काम गर्ने शैली मनपर्छ । त्यसकारण अनिल कपूरबाट केही सिक्नेछु’, उनले भने ।
‘अर्जुन रेड्डी’को हिन्दी भर्सन ‘कबीर सिंह’का निर्देशक सन्दिप रेड्डी भांगाले निर्देशन गर्ने फिल्ममा अनिल र विपिनसँगै रणवीर कपूर, बबी देओल र परिणीति चोपडाको पनि अभिनय रहनेछ ।