ब्रिसबेन: अष्ट्रेलियाको तेश्रो ठूलो सहर ब्रिसबेनमा नेपथ्यले प्रस्तुति दिएको छ। ब्रिसबेनको प्रस्तुतीसँगै नेपथ्यले अष्ट्रेलियामा यो वर्षका निम्ति प्रस्तावित आठमध्ये तेश्रो सो सम्पन्न गरेको छ।
सबै पुस्ताका दर्शक अटाएको हलमा वृद्धवृद्धादेखि तन्नेरी केटाकेटीसम्म खचाखच थिए। कोही ह्विलचियर गुडाउँदै आइपुगेका देखिन्थे। दर्शक रिना मोक्तानले ब्रिसबेनमा आजसम्म हेरेका व्यवस्थित कन्सर्टमध्येकै आफूलाई यो सबैभन्दा भव्य लागेको प्रतिक्रिया दिइन्।
‘विदेशमा कार्यक्रम गर्दा सप्ताहान्त परेन भने दर्शक जुटाउन गाह्रो पर्छ भन्ने मान्यता निकै अघिदेखि चल्दै आएको थियो’, नेपथ्यलाई व्यवस्थापन गर्दै आएका नेपालयका किरणकृष्ण श्रेष्ठ भन्छन्, ‘ब्रिसबेनमा नेपाली मात्र होइन विदेशी दर्शकको पनि भव्य उपस्थितिले त्यो पुरानो मान्यतालाई पनि तोडिदिएको छ।’
ब्याण्ड र व्यवस्थापनका १३ सदस्यीय टोलीमध्ये मञ्चमा भने गायक अमृतलाई सँधैजस्तै ड्रमसेटमा ध्रुव लामा, किबोर्डमा सुरज थापा, गितारमा निरज गुरुङ, बेस गितारमा सुविन शाक्य र मादलमा शान्ति रायमाझीले सघाएका थिए।
‘यति भव्य रुपमा सम्पन्न कन्सर्टको हिस्सा बन्न पाएकामा मेरो सम्पूर्ण टिम खुशीले गदगद भएको छ’, स्थानीय आयोजक टोलीमध्येका सुनील बस्नेतले भने, ‘दर्शकको उपस्थिति र अत्यन्त सकरात्मक प्रतिक्रियाले यो कार्यक्रमलाई भव्य र सभ्य बनाइदियो।’ अघिल्ला कन्सर्टहरूमा प्रस्तुत गरिएका गीतहरूको सेटलाई नै दोहो¥याइएको ब्रिसबेनको कन्सर्टमा पनि ‘यो जिन्दगानी’ गीत गाउने क्रममा सडक आश्रितहरूका दृश्य देखाइएको थियो। नेपालस्थित मानवसेवा आश्रमका आश्रितहरूको मन छुने दृश्य समेटेको त्यो भिडियोले धेरै दर्शकको मन छोएको देखिन्थ्यो।
त्यसै क्रममा अमृतले यो सिंगो वर्ष ब्याण्डलाई ‘मानवताको लागि संगीत’को निम्ति समर्पित गरेको उल्लेख गर्दै हालै यसै नाराका साथ नेपालभर गरिएको भव्य यात्राको स्मरण पनि गरे।